ଅନୁଗୁଳ : ଦେହ ଓ ମନର ଅବିଚ୍ଛିନ୍ନ ସମ୍ପର୍କକୁ ଦୃଷ୍ଟିରେ ରଖି ପ୍ରତ୍ୟେକ ବ୍ୟକ୍ତିଙ୍କ ସ୍ୱାସ୍ଥ୍ୟ ପ୍ରତି ସଚେତନ ଓ ଯତ୍ନଶୀଳ ହେବା ନିହାତି ଆବଶ୍ୟକ। ଏହି ମହତ୍ ଉଦ୍ଦେଶ୍ୟକୁ ସାମ୍ନାରେ ରଖି ଭାରତୀୟ ଯୋଗ ସଂସ୍ଥାନ ପକ୍ଷରୁ ଆଜି ତା ୨୭.୦୯.୨୦୨୬ରେ ଓଡ଼ିଶା ବ୍ରିଗେଡ୍ ସ୍କୁଲ ପରିସରରେ ଯୋଗ ମହୋତ୍ସବ ଅତ୍ୟନ୍ତ ଉତ୍ସାହ, ଆନନ୍ଦ ଓ ଆଧ୍ୟାତ୍ମିକ ଉଦ୍ଦୀପନାର ସହ ପାଳିତ ହୋଇଯାଇଛି।
ସୁନ୍ଦର ସକାଳର ଶୁଭ ମୁହୂର୍ତ୍ତରେ ଶଙ୍ଖଧ୍ୱନି ଓ ଦୀପ ପ୍ରଜ୍ୱଳନ ମାଧ୍ୟମରେ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା। ପରେ ଓଁକାର ଧ୍ୱନି, ଗାୟତ୍ରୀ ମନ୍ତ୍ର ଉଚ୍ଚାରଣ, ଯୋଗାଭ୍ୟାସ, ଧ୍ୟାନ ଏବଂ ଶାନ୍ତିପାଠ ଦ୍ୱାରା ସମଗ୍ର ପରିବେଶ ଆଧ୍ୟାତ୍ମିକ ଚେତନାରେ ଉଦ୍ଭାସିତ ହୋଇଉଠିଥିଲା।
ଅନୁଗୁଳର ୯ଟି ଯୋଗ କେନ୍ଦ୍ରର ସାଧକ-ସାଧିକା, ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କ ସମେତ ୧୫୦ରୁ ଊର୍ଦ୍ଧ୍ୱ ଯୋଗପ୍ରେମୀଙ୍କ ସକ୍ରିୟ ସହଭାଗିତା, ନିଷ୍ଠା ଓ ସହଯୋଗରେ ମହୋତ୍ସବଟି ଏକ ସ୍ମରଣୀୟ ଅନୁଭବରେ ପରିଣତ ହୋଇଥିଲା।
ଏକ ସୁସ୍ଥ, ସଂସ୍କାରବାନ୍ ଓ ଯୋଗମୟ ଭାରତ ଗଠନର ମହାନ ପରିକଳ୍ପନାକୁ ସାକାର କରିବା ଉଦ୍ଦେଶ୍ୟରେ ଉତ୍ସର୍ଗୀକୃତ ଏହି ସମାରୋହ ସମସ୍ତଙ୍କ ମନରେ ଆତ୍ମବିଶ୍ୱାସ, ଶୃଙ୍ଖଳା ଓ ସକାରାତ୍ମକ ଜୀବନଦୃଷ୍ଟିର ବାର୍ତ୍ତା ପ୍ରସାର କରିଥିଲା। ଏହା କେବଳ ଏକ ଉତ୍ସବ ନୁହେଁ, ବରଂ ଯୋଗ, ସଂସ୍କାର ଓ ମାନବିକ ମୂଲ୍ୟବୋଧର ଏକ ସୁନ୍ଦର ସମନ୍ୱୟର ଜୀବନ୍ତ ନିଦର୍ଶନ ଥିଲା।