କଟକ: ଗୃହ ଓ ନଗର ଉନ୍ନୟନ ମନ୍ତ୍ରୀ ତଥା କଟକ ଉନ୍ନୟନ କତ୍ତୃପକ୍ଷ (କେଡିଏ)ର ଅଧ୍ୟକ୍ଷ ଡ. କୃଷ୍ଣଚନ୍ଦ୍ର ମହାପାତ୍ର ଆଜି କଟକ ସେକ୍ଟର-୯ରେ ‘ମିଲେନିୟମ୍ ସିଟି ମାର୍କେଟ୍ କମ୍ପ୍ଲେକ୍ସ’ ଏବଂ ଇନ୍ଦ୍ରିୟ ବିକାଶ ଓ ବିଜ୍ଞାନ ଉଦ୍ୟାନର ଉଦ୍ଘାଟନ କରିଛନ୍ତି। ସହରର ନାଗରିକ ସୁବିଧାକୁ ସୁଦୃଢ଼ କରିବା ସହ ଆଧୁନିକ ଓ ନାଗରିକ-ଅନୁକୂଳ ସାର୍ବଜନୀନ ସ୍ଥାନ ସୃଷ୍ଟି ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
‘ମିଲେନିୟମ୍ ସିଟି ମାର୍କେଟ୍ କମ୍ପ୍ଲେକ୍ସ’ ମାଧ୍ୟମରେ ସହରବାସୀଙ୍କ ପାଇଁ ଅଧିକ ସୁସଂଗଠିତ ଓ ଉନ୍ନତ ବାଣିଜ୍ୟିକ ଭିତ୍ତିଭୂମି ଉପଲବ୍ଧ ହେବ।
ସେହିପରି, ସେନ୍ସୋରିଆଲ୍ ପାର୍କ ଏକ ବିଜ୍ଞାନଭିତ୍ତିକ ପାର୍କ ଭାବେ ବିକଶିତ ହୋଇଛି। ବିଭିନ୍ନ ବୈଜ୍ଞାନିକ ଧାରଣାକୁ ଇଣ୍ଟରଆକ୍ଟିଭ୍ ଓ ମନୋରଞ୍ଜନଧର୍ମୀ ଢଙ୍ଗରେ ଜାଣିବାର ସୁଯୋଗ ଏଠାରେ ମିଳିବ। ବିଶେଷକରି ଶିଶୁ ଓ ଯୁବ ଶିକ୍ଷାର୍ଥୀଙ୍କ ପାଇଁ ବିଜ୍ଞାନକୁ ସହଜ, ଆକର୍ଷଣୀୟ ଓ ଆନନ୍ଦଦାୟକ କରିବା ଏହି ପାର୍କର ଉଦ୍ଦେଶ୍ୟ। ଶିକ୍ଷା, ମନୋରଞ୍ଜନ ଓ ପ୍ରାକ୍ଟିକାଲ୍ ଅନୁଭୂତିର ସମନ୍ୱୟରେ ଏହାକୁ ଏକ ଖୋଲା ସାର୍ବଜନୀନ ସ୍ଥାନ ଭାବେ ବିକଶିତ କରାଯାଇଛି।
ଏହି ଅବସରରେ ମନ୍ତ୍ରୀ ଡ. ମହାପାତ୍ର ସେକ୍ଟର-୧୩ରେ ‘ଅଟଳ ପାର୍କ’ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଆଗାମୀ ଦିନରେ ଏହି ପାର୍କ କଟକ ସହରର ସାର୍ବଜନୀନ ମନୋରଞ୍ଜନ ଭିତ୍ତିଭୂମିରେ ଆଉ ଏକ ଗୁରୁତ୍ୱପୂର୍ଣ୍ଣ ଯୋଗଦାନ ହେବ। ଏଠାରେ ଲୋକଙ୍କ ପାଇଁ ଆଧୁନିକ ସବୁଜ ପରିବେଶ ଓ ସାମାଜିକ ମିଳନସ୍ଥଳ ଉପଲବ୍ଧ ହେବ।
ଏହି ଅବସରରେ ଡ. ମହାପାତ୍ର କହିଥିଲେ ଯେ, ରାଜ୍ୟ ସରକାର କଟକର ବିକାଶକୁ ପ୍ରାଥମିକତା ଦେଇଛନ୍ତି। କଟକ ଏକ ଐତିହାସିକ ଓ ଐତିହ୍ୟସମ୍ପନ୍ନ ସହର। ଆଗାମୀ ଦିନରେ ସହରରେ ଏକାଧିକ ବିକାଶମୂଳକ ପ୍ରକଳ୍ପ ହାତକୁ ନିଆଯିବ। ଯୋଜନାବଦ୍ଧ ନଗରୀୟ ବିକାଶ ସହ ନାଗରିକ ସୁବିଧାରେ ଉନ୍ନତି ଏବଂ ଉତ୍ତମ ସାର୍ବଜନୀନ ସ୍ଥାନ ସୃଷ୍ଟି ଉପରେ ସରକାରଙ୍କ ଫୋକସ୍ ରହିଛି ବୋଲି ସେ କହିଥିଲେ।
ଆଧୁନିକ ଭିତ୍ତିଭୂମି, ମନୋରଞ୍ଜନ ସୁବିଧା ଓ ସୁସଂଗଠିତ ବାଣିଜ୍ୟିକ ସ୍ଥାନର ବିକାଶ ନାଗରିକଙ୍କ ଜୀବନଧାରଣର ମାନକୁ ଆହୁରି ଉନ୍ନତ କରିବା ସହ କଟକର ସମୃଦ୍ଧ ଐତିହାସିକ ଓ ସାଂସ୍କୃତିକ ପରିଚୟକୁ ଆହୁରି ସମୃଦ୍ଧ କରିବ ବୋଲି ମନ୍ତ୍ରୀ କହିଥିଲେ।
ଏହି ପଦକ୍ଷେପଗୁଡ଼ିକ କଟକରେ ଯୋଜନାବଦ୍ଧ ନଗରୀୟ ବିକାଶ ସହ ସମସ୍ତଙ୍କ ପାଇଁ ସୁଗମ, ସ୍ଥାୟୀ ଓ ନାଗରିକ-କେନ୍ଦ୍ରିକ ଭିତ୍ତିଭୂମି ନିର୍ମାଣ ପ୍ରତି ସରକାରଙ୍କ ପ୍ରତିବଦ୍ଧତାକୁ ପ୍ରତିଫଳିତ କରୁଛି।
କାର୍ଯ୍ୟକ୍ରମରେ କଟକ ମହାନଗର ନିଗମର ମେୟର ଶ୍ରୀ ସୁବାସ ଚନ୍ଦ୍ର ସିଂହ, ଚୌଦ୍ୱାର-କଟକ ବିଧାୟକ ଶ୍ରୀ ସୌଭିକ ବିଶ୍ୱାଳ, କେଡିଏର ଉପାଧ୍ୟକ୍ଷା କିରଣଦୀପ କୌର ସହୋତାଙ୍କ ସମେତ କେ.ଡି.ଏ.ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।