ପରିବେଶର ସୁରକ୍ଷା ପାଇଁ ପ୍ଲାଷ୍ଟିକମୁକ୍ତ ପାନୀୟ ଜଳ ବ୍ୟବସ୍ଥା ଓ ବିଶୁଦ୍ଧ ଜଳ ଯୋଗାଣ
Prayagraj :: ଦେଶ ବିଦେଶର କୋଣ ଅନୁକୋଣରୁ ପ୍ରୟାଗରାଜର ମହାକୁମ୍ଭ ୨୦୨୫କୁ ଆସୁଥିବା ଲକ୍ଷ ଲକ୍ଷ ତୀର୍ଥଯାତ୍ରୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ବ୍ୟାପକ ବ୍ୟବସ୍ଥା କରାଯାଇଛି। ମେଳା ଅଞ୍ଚଳରେ ମୋଟ ୨୩ଟି ଜଳ ଏଟିଏମ୍ ସ୍ଥାପନ କରାଯାଇଛି, ଯାହାକି ନିରବଚ୍ଛିନ୍ନ ଭାବେ ଦିନ ରାତି ୨୪ ଘଣ୍ଟା କାମ କରିବ । ଏହି ଜଳ ଏଟିଏମ୍ ଜରିଆରେ ତୀର୍ଥଯାତ୍ରୀମାନେ ପ୍ରତିଦିନ ଆରଓ ର (ରିଭର୍ସ ଅସମୋସିସ୍) ବିଶୁଦ୍ଧ ପାନୀୟ ଜଳ ପାଉଛନ୍ତି। ସରକାରୀ ତଥ୍ୟ ଅନୁସାରେ ଜାନୁଆରୀ ୨୧, ୨୦୨୫ ଓ ଫେବ୍ରୁଆରୀ ୧, ୨୦୨୫ ମଧ୍ୟରେ ଏହି ଜଳ ଏଟିଏମରୁ ୪୦ ଲକ୍ଷ ତୀର୍ଥଯାତ୍ରୀ ଉପକୃତ ହୋଇଛନ୍ତି।
ତୀର୍ଥଯାତ୍ରୀଙ୍କ ସୁବିଧା ପାଇଁ ଏହି ଜଳ ଏଟିଏମ୍ ଜରିଆରେ ମାଗଣା ଜଳ ବଣ୍ଟନକୁ ଗୁରୁତ୍ୱ ଦେଇଛି ପ୍ରଶାସନ । ପ୍ରଥମେ ଏହି ପାନୀୟ ଜଳ ଲିଟର ପିଛା ୧ ଟଙ୍କାରେ ମିଳୁଥିଲା । ତୀର୍ଥଯାତ୍ରୀମାନଙ୍କୁ ମୁଦ୍ରା ଭର୍ତ୍ତି କରିବାକୁ ପଡୁଥିଲା ନ ହେଲେ ୟୁପିଆଇ ସ୍କାନିଂ କରି ସେମାନେ ପାନୀୟ ଜଳ ପାଇପାରୁଥିଲେ। ତେବେ ବର୍ତ୍ତମାନ ଏହାକୁ ପୁରାପୁରି ମାଗଣା କରି ଦିଆଯାଇଛି ଯାହା ଦ୍ୱାରା କି ତୀର୍ଥଯାତ୍ରୀମାନେ ବିନା କୌଣସି ପ୍ରତିବନ୍ଧକରେ ବିଶୁଦ୍ଧ ପାନୀୟ ଜଳ ପାଇପାରିବେ । ପ୍ରତ୍ୟେକ ଏଟିଏମ୍ ରେ ଜଣେ ଲେଖାଏଁ ଅପରେଟର୍ ଉପସ୍ଥିତ ରହିଥାନ୍ତି। ତୀର୍ଥଯାତ୍ରୀମାନେ ବଟନ୍ ଚିପିବା ମାତ୍ରେ ଯେମିତି ତୁରନ୍ତ ବିଶୁଦ୍ଧ ପାନୀୟ ଜଳ ପାଇବେ, ସେଥିପ୍ରତି ଧ୍ୟାନ ଦିଅନ୍ତି ଏହି ଅପରେଟର୍। ଏହା ଦ୍ୱାରା ତୀର୍ଥଯାତ୍ରୀମାନେ କୌଣସି ସମସ୍ୟାର ସମ୍ମୁଖୀନ ନ ହୋଇ ବିଶୁଦ୍ଧ ପାନୀୟ ଜଳ ପାଆନ୍ତି ଏବଂ ଏହିପରି ଭାବେ ନିରବଚ୍ଛିନ୍ନ ଭାବେ ପାନୀୟ ଜଳ ଯୋଗାଣ ହୋଇଥାଏ।
ମହାକୁମ୍ଭରେ ଲଗାଯାଇଥିବା ପାଣି ଏଟିମ୍ ରେ ଅତ୍ୟାଧୁନିକ ଟେକ୍ନୋଲଜି ଅଛି ଯାହା ଦ୍ୱାରା କି ଏହି ପାଣି ଏଟିଏମ୍ ସ୍ୱୟଂକ୍ରିୟ ଭାବେ ଓ ସୁରୁଖୁରୁରେ କାମ କରିଥାଏ। ଏହି ମେସିନରେ ସେନସର୍ ଆଧାରିତ ଏକ ମନିଟରିଂ ବ୍ୟବସ୍ଥା ଲାଗିଛି। କୌଣସି ବୈଷୟିକ ତ୍ରୁଟି ଦେଖା ଦେଲେ, ଏହା ତୁରନ୍ତ ତାକୁ ଚିହ୍ନଟ କରିଥାଏ। କୌଣସି ବୈଷୟିକ ତ୍ରୁଟି ହେଲେ ଜଳ ନିଗମର ଟେକ୍ନିସିଆନମାନେ ତୁରନ୍ତ ତାକୁ ମରାମତି କରି ଦିଅନ୍ତି । ଏହା ଦ୍ୱାରା ତୀର୍ଥଯାତ୍ରୀଙ୍କୁ ଲଗାତର ଭାବେ ବିଶୁଦ୍ଧ ପିଇବା ପାଣି ମିଳିଥାଏ। ମହାକୁମ୍ଭରେ ଏତେ ସଂଖ୍ୟକ ତୀର୍ଥଯାତ୍ରୀ ଆସୁଥିବାରୁ ପ୍ରତ୍ୟେକ ପାଣି ଏଟିଏମ୍ ପ୍ରତିଦିନ ୧୨୦୦୦ରୁ ୧୫୦୦୦ ଲିଟର ବିଶୁଦ୍ଧ ଆରଓ ପାଣି ପ୍ରଦାନ କରିଥାନ୍ତି । ସବୁ ପାଣି ଏଟିଏମରେ ସିମ୍ ଆଧାରିତ ଟେକ୍ନୋଲଜି ଲାଗିଛି। ଫଳରେ ଏହି ପାଣି ଏଟିମ୍ ଗୁଡ଼ିକ ପ୍ରଶାସନର କେନ୍ଦ୍ରୀୟ ନେଟଓ୍ୱର୍କ ସହିତ ସଂଯୁକ୍ତ ରହିଥାଏ।
ଏହି ଟେକ୍ନୋଲଜିରୁ ନିରବଚ୍ଛିନ୍ନ ଭାବେ ଜାଣିହୁଏ ମୋଟ କେତେ ପାଣି ବ୍ୟବହାର କରାଯାଉଛି, କେତେ ପାଣି ଅଛି, ପାଣିର ମାନ କେମିତି ଅଛି ଓ କେତେ ପାଣି ବଣ୍ଟନ ହୋଇଛି। ଯେତେବେଳେ ବି ଜଣେ ତୀର୍ଥଯାତ୍ରୀ ପାଣି ଏଟିଏମ୍ ବ୍ୟବହାର କରନ୍ତି, ଥରକରେ ଗୋଟିଏ ଲିଟର୍ ପାଣି ବାହାରିଥାଏ। ସ୍ପାଉଟ ତଳେ ରଖାଯାଇଥିବା ବୋତଲରେ ଏହି ପାଣି ଭର୍ତ୍ତି ହୋଇଥାଏ। ପୂର୍ବର କୁମ୍ଭମେଳାଗୁଡ଼ିକରେ ପ୍ଲାଷ୍ଟିକ ପାଣି ବୋତଲ ଓ ଅନ୍ୟାନ୍ୟ ଆବର୍ଜନା ଯୋଗୁଁ ସଂଗମରେ ଓ ବିଭିନ୍ନ ଘାଟରେ ବହୁତ ପ୍ରଦୂଷଣ ହେଉଥିଲା। ଏଥର ପ୍ରଶାସନ କେବଳ ବିଶୁଦ୍ଧ ପାନୀୟ ଜଳ ଯୋଗାଣ ଉପରେ ଗୁରୁତ୍ୱ ଦେଇନାହିଁ, ବରଂ ପରିବେଶର ସୁରକ୍ଷା ଉପରେ ମଧ୍ୟ ଫୋକସ୍ କରିଛି।
ମହାକୁମ୍ଭ ସରିବା ପର୍ଯ୍ୟନ୍ତ ଏହି ପାଣି ଏଟିଏମଗୁଡ଼ିକ ଯେମିତି ନିରବଚ୍ଛିନ୍ନ ଭାବେ କାମ କରନ୍ତି, ସେଥିପ୍ରତି ମହାକୁମ୍ଭ ପ୍ରଶାସନ ଗୁରୁତ୍ୱ ପ୍ରଦାନ କରିଛି। ପାଣି ଏଟିଏମ୍ ରେ ଯଦି କୌଣସି ସମସ୍ୟା ହୁଏ, ତାର ସମାଧାନ କରିବାକୁ ଓ ନିୟମିତ ପାଇଁ ମନିଟରିଂ କରିବାକୁ ଗଠନ କରାଯାଇଛି ସ୍ୱତନ୍ତ୍ର ଟେକ୍ନିସିଆନ୍। ଆଗାମୀ କୁମ୍ଭ ଓ ଅନ୍ୟ ଧାର୍ମିକ ସମାବେଶରେ ତୀର୍ଥଯାତ୍ରୀମାନେ ଯେମିତି ସହଜରେ ବିଶୁଦ୍ଧ ପାନୀୟ ଜଳ ପାଇପାରିବେ, ସେଥିପାଇଁ ଏପରି ବ୍ୟବସ୍ଥା କରିବାକୁ ପ୍ରଶାସନ ବିଚାର କରୁଛି। ଏହି ଜଳ ଏଟିଏମ୍ ଯୋଜନା ମହାକୁମ୍ଭ ୨୦୨୫କୁ ଆହୁରି ଅଧିକ ସୁରକ୍ଷିତ, ସୁବିଧାଜନକ ଓ ପରିବେଶ ଅନୁକୂଳ କରିଛି। ଆଗାମୀ ଦିନର ଜନସମାଗମ ପାଇଁ ଏହା ସୃଷ୍ଟି କରିଛି ଐତିହାସିକ ଓ ଦୃଷ୍ଟାନ୍ତମୂଳକ ମାନଦଣ୍ଡ ।