ଖୁସିରେ ହେଉ କି ଉତ୍ସବରେ ହେଉ
ଖାଅ ନାହିଁ କେବେ ମଦ,
ଖୁସିର ଅଭ୍ୟାସ ହେଲେ ପରିଣତ
ଘୋଟି ଆସିବ ବିପଦ ।
ଏ ସାରା ବିଶ୍ବରେ ବିଭିନ୍ନ ଉପାଧି
ପ୍ରତିଭା ହେଉ ବା ଖେଳ,
ଦେଖିଛ କି କେବେ ନିଶାଖୋରୀ ଜନେ
ଆନନ୍ଦ ଉଲ୍ଲାସ ବେଳ ।
ଯଦି କେହି ଗୁରୁ ପଚାରେ ଆମକୁ
କେଉଁ କର୍ମ ମାରାତ୍ମକ ?
ମଦ୍ୟପାନ ଶବ୍ଦ ହୁଅଇ ନିର୍ଗତ
ବଦନ ହୋଇ ବିମୁଖ ।
ପାଠ-ଶାଠ ଜ୍ଞାନ- ଗାରିମା ହୁଅନ୍ତି
ମଦ୍ୟପ ତୁଣ୍ଡେ ବିକଳ,
କ୍ରୋଧ ବ୍ୟଭିଚାର ଅଶାଳୀନ ପାପ
ଘୂରନ୍ତି ମୁଣ୍ଡେ ପ୍ରବଳ ।
ଦେବୀ ଲକ୍ଷ୍ମୀ ସାଥେ ଦେବୀ ସରସ୍ଵତୀ
ବିକଳେ ଛାଡ଼ନ୍ତି ଘର,
ଅର୍ଥାଭାବ ସାଥେ ଅଜ୍ଞାନ ତିମିରେ
ମଦ୍ୟପ ପାଲଟେ ଚୋର ।
ସମାଜ ଆଖିରେ ଘୃଣିତ ହୋଇଲେ
ନଷ୍ଟ ହୁଅଇ ଇଜ୍ଜତ,
ଯାହା ଆଉ କେବେ ଫେରେନା ଜୀବନେ
ମାନ ସମ୍ମାନ ବ୍ୟକ୍ତିତ୍ଵ ।
ଆସ ଆସ ଭାଇ ନିଶା ବିରୋଧରେ
ଚଲାଇବା ଅଭିଯାନ,
ସ୍ଵଦେଶ ସଂସ୍କୃତି ମହକେ ରଚିବା
ଦେଶପ୍ରେମ ସ୍ଵାଭିମାନ ।
( କବି ଶ୍ରୀ ଶମ୍ଭୁନାଥ ଦାସ, ଯାଜପୁର )