ରାୟଗଡ଼ା , ( ସୁରେନ୍ଦ୍ର ରଥ ) ,୧୫ ଅକ୍ଟୋବର: ରାୟଗଡ଼ା ସ୍ଥିତ ଜେମ୍ସ ଇନଷ୍ଟିଚ୍ୟୁଟ ପରିସରରେ ଡକ୍ଟର ଏପିଜେ ଅବଦୁଲ କଲାମ ଫାଉଣ୍ଡେସନ ତରଫରୁ ଭାରତରତ୍ନ ତଥା ପୂର୍ବତନ ରାଷ୍ଟ୍ରପତି ଡକ୍ଟର ଏପିଜେ ଅବଦୁଲ କଲାମଙ୍କ ଜୟନ୍ତୀ ଏବଂ ଫାଉଣ୍ଡେସନର ବାର୍ଷିକ ପ୍ରତିଷ୍ଠା ଦିବସ ମହାସମାରୋହରେ ପାଳିତ ହୋଇଯାଇଛି। ଫାଉଣ୍ଡେସନର ପ୍ରତିଷ୍ଠାତା ଶ୍ରୀ ବୋଗିଲି ରାଜେଶ କୁମାରଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା ଡକ୍ଟର କଲାମଙ୍କ ଶିକ୍ଷା, ବୈଜ୍ଞାନିକ ଉଦ୍ଭାବନ, ଯୁବ ସଶକ୍ତୀକରଣ, ଦେଶପ୍ରେମ ଏବଂ ସମାଜସେବାର ଆଦର୍ଶକୁ ଜନମାନସରେ ଉଜ୍ଜୀବିତ ରଖିବା।
କାର୍ଯ୍ୟକ୍ରମର ଶୁଭାରମ୍ଭରେ ଅତିଥିମାନଙ୍କ ଦ୍ୱାରା ପ୍ରଦୀପ ପ୍ରଜ୍ୱଳନ କରାଯିବା ସହ ଡକ୍ଟର କଲାମଙ୍କ ପ୍ରତିଛବିରେ ପୁଷ୍ପମାଲ୍ୟ ଅର୍ପଣ କରି ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା। ଏହି ଅବସରରେ ମହାନ ବୈଜ୍ଞାନିକ ତଥା ଜନସାଧାରଣଙ୍କ ରାଷ୍ଟ୍ରପତି ଡକ୍ଟର କଲାମଙ୍କ ଦେଶପ୍ରତି ଥିବା ଅତୁଳନୀୟ ଅବଦାନ ଓ ଯୁବପିଢ଼ିଙ୍କୁ ଦେଖାଇଥିବା ଦିଗ୍ଦର୍ଶନକୁ ସ୍ମରଣ କରାଯାଇଥିଲା।
ଏହି ସମାରୋହରେ ମୁଖ୍ୟ ଅତିଥି ଭାବେ ଡକ୍ଟର ଗୌତମ ପଟ୍ଟନାୟକ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ପୂର୍ବତନ ସୈନିକ ସଂଘର ସମ୍ପାଦକ ଶ୍ରୀ ସୁରଜିତ ହୋତା ଏବଂ ଜେମ୍ସ ଇନଷ୍ଟିଚ୍ୟୁଟର ପ୍ରତିଷ୍ଠାତା ତଥା ଅଧ୍ୟକ୍ଷ ଶ୍ରୀ ଏ. ଭି. ଏସ. ଗିରି ଉପସ୍ଥିତ ଥିଲେ। ଅନ୍ୟାନ୍ୟ ବିଶିଷ୍ଟ ଅତିଥିମାନଙ୍କ ମଧ୍ୟରେ ଫାଉଣ୍ଡେସନର ସହ-ପ୍ରତିଷ୍ଠାତା ତଥା ଶ୍ରୀ ଲକ୍ଷ୍ମୀ ଗଣେଶ ମେଡିକାଲ୍ସର ପରିଚାଳନା ନିର୍ଦ୍ଦେଶକ ଶ୍ରୀ ବି. ଜନାର୍ଦ୍ଦନ, ରାୟଗଡ଼ା ବଜରଙ୍ଗ ଦଳ ଜିଲ୍ଲା ସଂଯୋଜକ ଶ୍ରୀ ଶସ୍ୟ ଜ୍ୟୋତି ବେହେରା ଏବଂ ରକ୍ତଭଣ୍ଡାରର କାର୍ଯ୍ୟାଳୟ ସହାୟକ ଶ୍ରୀ ଉମାକାନ୍ତ ମିଶ୍ର ପ୍ରମୁଖ ମଞ୍ଚାସୀନ ଥିଲେ।
ସଭାରେ ଉଦବୋଧନ ଦେଇ ଅତିଥିମାନେ ଡକ୍ଟର କଲାମଙ୍କ ଅନୁଶାସନ, କଠିନ ପରିଶ୍ରମ, ବୈଜ୍ଞାନିକ ମନୋଭାବ ତଥା ରାଷ୍ଟ୍ର ନିର୍ମାଣର ଆଦର୍ଶକୁ ଜୀବନରେ ଆପଣେଇବାକୁ ଛାତ୍ରଛାତ୍ରୀମାନଙ୍କୁ ଆହ୍ୱାନ ଦେଇଥିଲେ। ଏଥିସହ ସେମାନେ ନେତୃତ୍ୱ ଗୁଣ ବିକାଶ କରି ସମାଜର ଉନ୍ନତିରେ ସହଭାଗୀ ହେବାକୁ ପ୍ରେରଣା ଦେଇଥିଲେ। ଶିକ୍ଷା ଓ ସାମାଜିକ କଲ୍ୟାଣ କ୍ଷେତ୍ରରେ ଫାଉଣ୍ଡେସନର ନିରନ୍ତର ପ୍ରୟାସକୁ ଅତିଥିମାନେ ଭୂୟସୀ ପ୍ରଶଂସା କରିଥିଲେ।
ଜେମ୍ସ ଇନଷ୍ଟିଚ୍ୟୁଟର ଛାତ୍ରଛାତ୍ରୀ ଓ ଅଧ୍ୟାପକ-କର୍ମଚାରୀଙ୍କ ଉତ୍ସାହପୂର୍ଣ୍ଣ ଯୋଗଦାନ କାର୍ଯ୍ୟକ୍ରମକୁ ସଫଳ କରିବାରେ ବିଶେଷ ସହାୟକ ହୋଇଥିଲା। ପରିଶେଷରେ ଫାଉଣ୍ଡେସନର ପ୍ରତିଷ୍ଠାତା ଶ୍ରୀ ବୋଗିଲି ରାଜେଶ କୁମାର ସମସ୍ତ ଅତିଥି, କଲେଜ ପରିଚାଳନା କମିଟି, ଶିକ୍ଷକ, ଛାତ୍ରଛାତ୍ରୀ ତଥା ସହଯୋଗୀମାନଙ୍କୁ ଧନ୍ୟବାଦ ଅର୍ପଣ କରିଥିଲେ। ରାୟଗଡ଼ା ଜିଲ୍ଲାର ତଥା ଦେଶର ଉନ୍ନତି ପାଇଁ ଶିକ୍ଷା, ଯୁବ ସଶକ୍ତୀକରଣ ଓ ସମାଜସେବା କାର୍ଯ୍ୟକୁ ଆଗକୁ ବଢ଼ାଇବାକୁ ଫାଉଣ୍ଡେସନ ପକ୍ଷରୁ ସଂକଳ୍ପ ଦୋହରା ଯାଇଥିଲା।