କର୍ପୂର ଉଡ଼ିଛି କନା ପଡ଼ିଅଛି
ରତ୍ନଗିରି ଉତ୍କଳର,
ଯାହା ପୁଷ୍ପଗିରି ବିଶ୍ଵବିଦ୍ୟାଳୟ
ଖ୍ରୀଷ୍ଟପୂର୍ବ କଳିଙ୍ଗର ।
ତାମିଲନାଡୁରେ ତକ୍ଷଶିଳା ଆଉ
ନାଳନ୍ଦା ବିହାର ରାଜ୍ଯ,
ବିଶ୍ବବିଦ୍ୟାଳୟେ ବୌଦ୍ଧ ଶିଷ୍ଯଗଣେ
ବୌଦ୍ଧିକ ଜ୍ଞାନେ ନିର୍ବ୍ଯାଜ ।
ଅନ୍ଧକାରେ ଅନ୍ଧ ବାଡ଼ିକୁ ବୁଲେଇ
ପ୍ରାପ୍ତେ ଅପ୍ରାପ୍ତେ ଅଶ୍ରୁଳ,
ସ୍ବତନ୍ତ୍ର ଉତ୍କଳ ବିଶ୍ୱବିଦ୍ୟାଳୟ
ଭୁବନେଶ୍ବର ଅଞ୍ଚଳ ।
ସ୍ବତନ୍ତ୍ର ଉତ୍କଳେ ବିଶ୍ବବିଦ୍ୟାଳୟ
ବିହୁନରେ ଅସ୍ତବ୍ୟସ୍ତ,
ସାତବର୍ଷ ପରେ ଶିକ୍ଷାମନ୍ତ୍ରୀ ସୃଜ୍ଯ
ପଣ୍ଡିତ ଗୋଦାବରୀଶ ।
ଊନବିଂଶ ତେୟା – ଳିଶ ନଭେମ୍ବର
ସତେଇଶ ସ୍ବୀକୃତିର,
ଉତ୍କଳେ ଉତ୍କଳ ବିଶ୍ୱବିଦ୍ୟାଳୟ
ଜମି ଚାରିଶ’ ଏକର ।
ରେଭେନ୍ସା କଲେଜ ଅଭିଜ୍ଞ ଅଧ୍ୟକ୍ଷ
ଯେ’ ପରିଜା ପ୍ରାଣକୃଷ୍ଣ,
କୁଳପତି ଭାବେ ଦାୟିତ୍ବ ନିର୍ବାହେ
ପ୍ରଥମ ଓ ସର୍ବାଧିକ ।
ବିଭାଗୀୟ ପାଠ୍ଯ ଶୁଭାରମ୍ଭ ସନ
ଊନବିଂଶ ତେୟାଳିଶ,
ଅଟ୍ଟାଳିକା କ୍ରମା- ନ୍ବୟରେ ନିର୍ମାଣ
ରୂପରେଖୀୟ ଭବିଷ୍ୟ ।
ଊନବିଂଶ ଅଠା- ବନ ଜାନୁଆରୀ
ଏକରେ ଭିତ୍ତିପ୍ରସ୍ତର,
ସ୍ବୟଂ ରାଷ୍ଟ୍ରପତି ରାଜେନ୍ଦ୍ର ପ୍ରସାଦ
ପାଠାନୁଗ୍ରହେ ତତ୍ପର ।
ପାଞ୍ଚ ବର୍ଷାନ୍ତରେ ଉଦ୍ଘାଟନ ପର୍ବେ
ସର୍ବପଲ୍ଲୀ ରାଧାକ୍ରିଷ୍ଣ ,
ସୁଉଚ୍ଚାଟାଳିକା ପାଠ୍ଯ ପ୍ରାଚୁର୍ଯ୍ୟତା
ସୁରମ୍ଯ ଦୃଶ୍ଯେ ମୋହିତ ।
ବିଶ୍ବନାଥ ଦାଶ ନୀଳକଣ୍ଠ ଦାସ
ମହାରାଜା କୃଷ୍ଣଚନ୍ଦ୍ର,
ଯାହାଙ୍କ ଉତ୍କଳ ବିଶ୍ୱବିଦ୍ୟାଳୟ
ମାନସ ପୁତ୍ର ସୁନନ୍ଦ ।
ରାଜ୍ୟ ରାଜ୍ଯପାଳ କୁଳାଧିପତି ଯେ’
କୁଳପତି ଜ୍ଞାନାଧୀଶ,
ଶିକ୍ଷା ସ୍ନାତକଠୁ ସ୍ନାତକୋତ୍ତର ଯେ’
ସର୍ବ ବିଭାଗେ ବିଶେଷ ।
କଳା ବିଜ୍ଞାନ ଓ ବାଣିଜ୍ଯ ସହିତ
ପ୍ରବନ୍ଧନ ଅଧ୍ୟୟନ,
ସାମ୍ବାଦିକତା ଓ ଆଇନ ସହିତ
ସବିଶେଷ ଗବେଷଣ ।
ଯେ’ ପାଞ୍ଚ ହଜାର ବିଦ୍ୟାର୍ଥୀ ପୋଷିତ
ନିଜସ୍ବ ବକ୍ଷେ ଧାରଣ,
ତିନି ଶ’ ପଚାଶ ମହାବିଦ୍ୟାଳୟ
କାର୍ଯ୍ୟଭାର ନିୟନ୍ତ୍ରଣ ।
ସକଳ ବିଦ୍ୟାର୍ଥୀ ସାଫଲ୍ଯ ଅର୍ଜନେ
ଦେଶ-ବିଦେଶେ ବିଖ୍ୟାତ,
ଡାକ୍ତର ଓକିଲ ବୈଜ୍ଞାନିକ ଅବା
ରାଜନୀତିଜ୍ଞ ପ୍ରଖ୍ୟାତ ।
ବିଭାଗୀୟ ପତ୍ର – ପତ୍ରିକା ମୁଦ୍ରିତ
ବାଣୀପ୍ରଜ୍ଞା ଯେ’ ସାହିତ୍ଯ,
ସ୍ମରଣେ ପରିଜା ପାଠାଗାର ବିଶ୍ବ-
ବିଦ୍ୟାଳୟ ଅନ୍ତର୍ଭୁକ୍ତ ।
ଆରାଧ୍ଯ ଦେବତା ପ୍ରଭୁ ଜଗନ୍ନାଥ
ମନ୍ଦିର ଶୋଭେ ପ୍ରାଙ୍ଗଣ,
ସାଇ ମନ୍ଦିର ଓ ଦେବୀ ସରସ୍ଵତୀ
ଯଥାବିଧିରେ ପୂଜନ ।
ଭାବ-ଭକ୍ତିମୟ ଶିବ-ମନ୍ଦିର ଓ
ତାଳପଦେଶ୍ବରୀ ମାତ,
ଘଣ୍ଟ-ଘଣ୍ଟା ଧ୍ବନି ସୌରଭିତ ସାଂଧ୍ଯ
ଆରାଧନେ ଛାତ୍ରୀ-ଛାତ୍ର ।
ସୁଦୃଶ୍ୟ ଫାଟକ ବାଣୀ ବିରାଜିତ
ପ୍ରବେଶ ପଥ ସ୍ବାଗତ,
ସବୁଜ ତୃଣୀୟ ଗାଲିଚା ଆମୋଦ
ଚିତ୍ତାକର୍ଷକ ସ୍ବତନ୍ତ୍ର ।
ଉତ୍କଳଜନନୀ ପୁଣ୍ଯ ରାଜଧାନୀ
ବନ୍ଦାପନ ମୁଖପତ୍ର,
ଉତ୍କଳ-ଭାରତେ ଗୌରବ ସୌରଭ
ବିଚ୍ଛୁରିତ ଜ୍ଞାନାମୃତ ।
ଭୁବନେଶ୍ବରସ୍ଥ ବାଣୀବିହାର ଯେ’
ଜ୍ଞାନଭଣ୍ଡାରୀୟ ସ୍ଥାନ,
ପରିସ୍ଥିତି ସଦା ନରମ ଗରମ
ପରିବେଶ କୁଞ୍ଜବନ ।
ଦିବସୀୟ କାର୍ଯ୍ୟ ପାଠ୍ଯ କୋଳାହଳ
ସୂର୍ଯ୍ୟାସ୍ତେ ଝାଉଁ ପବନ,
ସଂଧ୍ୟାରୁ ଗଭୀର ରଜନୀ ଜ୍ୟୋତ୍ସ୍ନାରେ
ପ୍ରେମ ମକରନ୍ଦ ପାନ ।
ଆମ୍ର ଓ କଦମ୍ବ ଯୂଇ ଜାଇ ମଲ୍ଲୀ
ରୋମାଞ୍ଚ-ପୁଷ୍ପ ସୁବାସ,
ସାଂଧ୍ଯ-ଭ୍ରମଣରେ ଆଘ୍ରାଣେ ବିମୁଗ୍ଧ
କବି ଶମ୍ଭୁନାଥ ଦାସ ।🌹
ଶମ୍ଭୁନାଥ ଦାସ
ସା/କଣ୍ଟିବାଙ୍କ (ପାଲଟପୁର), ମଙ୍ଗଳପୁର,
ଯାଜପୁର