କଟକ:୦୭/୧୦ ଓଡ଼ିଶା ସରକାରଙ୍କ ଏମ୍ଏସ୍ଏମ୍ଇ ବିଭାଗ ପକ୍ଷରୁ ‘ସିଭିଲ୍ କମ୍ପୋନେଣ୍ଟସ୍’ (ସିଭିଲ୍ ଉପାଦାନ) ଉପରେ ଏକ ଭେଣ୍ଡର ଡେଭଲପମେଣ୍ଟ ପ୍ରୋଗ୍ରାମ୍ କଟକସ୍ଥିତ ଓଇଆ (OYEA) ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଭୁବନେଶ୍ୱରସ୍ଥିତ କେନ୍ଦ୍ରୀୟ ଟୁଲ୍ ରୁମ୍ ଆଣ୍ଡ ଟ୍ରେନିଂ ସେଣ୍ଟର (CTTC) ପକ୍ଷରୁ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା।
କାର୍ଯ୍ୟକ୍ରମ ଆରମ୍ଭରେ ଅଂଶ ଗ୍ରହଣକାରୀଙ୍କ ପଞ୍ଜୀକରଣ ପରେ ସିଟିଟିସି ଭୁବନେଶ୍ୱରର ଷ୍ଟୋର୍ସ ଅଫିସର ଦିଲୀପ କୁମାର ବିଶ୍ୱାଳ ସ୍ୱାଗତ ଅଭିଭାଷଣ ପ୍ରଦାନ କରିଥିଲେ। ସିଟିଟିସିର ବରିଷ୍ଠ ପ୍ରବନ୍ଧକ (ଏମ୍ ଆଣ୍ଡ୍ ସି) ଏ.ଏନ୍. ପାତ୍ର କାର୍ଯ୍ୟକ୍ରମର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ଅବଗତ କରାଇଥିଲେ।
ଓଡ଼ିଶା ଯୁବ ଶିଳ୍ପଦ୍ୟୋଗ ସଂଘ ( OYEA)ର ପଚାଶ ବର୍ଷ ପୂର୍ତ୍ତି ଓ ସ୍ବର୍ଣ୍ଣ ଜୟନ୍ତୀ ଅବସରରେ ଓଇଆ-କଟକର ସଭାପତି ମିହିର କାନୁନ୍ଗୋ ଅଭିଭାଷଣ ପ୍ରଦାନ କରିଥିବାବେଳେ କଟକ ଜିଲ୍ଲା ଶିଳ୍ପ କେନ୍ଦ୍ର (ଡିଆଇସି)ର ମହାପ୍ରବନ୍ଧକ ମନୋଜ କୁମାର ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇଥିଲେ।
କାର୍ଯ୍ୟକ୍ରମରେ ବିଭିନ୍ନ କ୍ରେତା ସଂସ୍ଥାର ପ୍ରତିନିଧିମାନେ ଯୋଗଦେଇ ସେମାନଙ୍କ ଆବଶ୍ୟକତା ଓ ବ୍ୟବସାୟିକ ସୁଯୋଗ ସମ୍ପର୍କରେ ଉପସ୍ଥାପନା କରିଥିଲେ। ଏହାପରେ କ୍ରେତା-ବିକ୍ରେତା ସମ୍ମିଳନୀ ଓ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଏଥିରେ ଉଦ୍ୟୋଗୀ ଓ କ୍ରେତାଙ୍କ ମଧ୍ୟରେ ସିଧାସଳଖ ଆଲୋଚନା ସହିତ ବ୍ୟବସାୟିକ ସମ୍ପର୍କ ଓ ନେଟୱାର୍କିଂ ସୃଷ୍ଟି ପାଇଁ ସୁଯୋଗ ପ୍ରଦାନ କରାଯାଇଥିଲା।
ଏକକ-ଏକକ ଆଲୋଚନା ମାଧ୍ୟମରେ ଉଦ୍ୟୋଗୀମାନେ କ୍ରେତା ସଂସ୍ଥାଗୁଡ଼ିକର ପ୍ରତିନିଧିଙ୍କ ସହ ନିଜ ଉତ୍ପାଦ, ସେବା ଓ ବ୍ୟବସାୟିକ ସମ୍ଭାବନା ସମ୍ପର୍କରେ ମତବିନିମୟ କରିଥିଲେ। ଶେଷରେ ଅଂଶଗ୍ରହଣକାରୀଙ୍କ ମତାମତ ସଂଗ୍ରହ କରାଯାଇଥିଲା। ଓଇଆ-କଟକର ସାଧାରଣ ସମ୍ପାଦକ ଶିବବ୍ରତ ରାଉତ ଧନ୍ୟବାଦ ଅର୍ପଣ କରିଥିଲେ।