🌷 ବିଶ୍ବ ପ୍ରକୃତି ଦିବସ 🥦 World Nature Day: 3rd October

ଆହାଃ କି ସୁନ୍ଦର ପ୍ରକୃତି ସୃଜନ
ମୃତ୍ତିକା ପାଣି ପବନ,
ନଦୀ ଓ ସାଗର ଝରଣା ପର୍ବତ
ଜୀବଜନ୍ତୁ ଭିନ୍ନ ଭିନ୍ନ ।

ଜୀବଜଗତରେ ପ୍ରାଣୀ ଓ ଉଦ୍ଭିଦ
ସନ୍ତୁଳନ ପରିବେଶ,
ସୁନ୍ଦର ତୃପ୍ତିର ନାହିଁ ଅବସାଦ
ବର୍ଣ୍ଣନେ କବି ମାନସ ।

ପାହାଡ଼ ପର୍ବତ ଗିରି ହିମାଳୟ
ଅବା ଏଭେରେଷ୍ଟ ଶୃଙ୍ଗ,
କୁଳୁକୁଳୁ ନାଦ ଝରଣା ସଙ୍ଗୀତ
ସାଗର ପିଟେ ମୃଦଙ୍ଗ ।

ପାହାଡ଼ ପର୍ବତୁ ଉତ୍ପତ୍ତିରେ ନଦୀ
ମୃତ୍ତିକା ଚିରି ଗମନ,
ସବୁଜ ବନାନୀ ପୃଥିବୀରେ ସୃଜି
ସିନ୍ଧୁକୁ କରେ ଲମ୍ଫନ ।

ଶୋଭାର ଭଣ୍ଡାର ଫଳ ଫୁଲ ପତ୍ର
ବନ ଉଦ୍ଯାନେ ପାଦପ,
ପଶୁ-ପକ୍ଷୀଙ୍କର ଗର୍ଜନ ଗୁଞ୍ଜନ
ଶ୍ରବଣେ କବିତା ଗଳ୍ପ ।

ସୁନ୍ଦର ସୁଦୃଶ୍ୟ ସୃଜନେ ବିଭୋର
ବିଶ୍ବ ପ୍ରକୃତି ସଂସ୍ଥାନ,
ରକ୍ଷଣାବେକ୍ଷଣ ଦିଗେ ସଚେତନ
ବିଶ୍ବ ସମାଜେ ଆହ୍ବାନ ।

ତିନି ଅକ୍ଟୋବର ଦି’ ହଜାର ଦଶ
ମସିହା ଠାରୁ ଗଣନ,
ବିଶ୍ବ ପ୍ରକୃତିର ଦିବସ ପାଳନେ
ସୁରକ୍ଷାରେ ମନ-ଧ୍ୟାନ ।

ଶମ୍ଭୁନାଥ ଦାସ

ସା/ କଣ୍ଟିବାଙ୍କ (ପାଲଟପୁର), ମଙ୍ଗଳପୁର,
ଯାଜପୁର – ୭୫୫୦୧୧