🛕 ଜୀବନ ପ୍ରବାହ

ସୁଖ ଅଛି, ଦୁଃଖ ଅଛି
ଦୁହେଁ ବି ନାହାଁନ୍ତି
କଳକଳ ଜୀବନ ପ୍ରବାହ
କାରଣ, ଜୀବନଟା ଜୀବନ କେବଳ ।

କଳା ଅଛି, ଧଳା ଅଛି
ଦୁହେଁ ବି ନାହାଁନ୍ତି
ରଙ୍ଗୀନ ଜୀବନର ଗାତ୍ରେ
ଚଳଚ୍ଚିତ୍ର ଜୀବନ କେବଳ ।

ବିଷ ଅଛି, ଅମୃତ ବି
ଦୁହେଁ ବି ନାହାଁନ୍ତି
ପାଚକଖାନାରେ ତଥାପି
ଛନ୍ଦା-ଛନ୍ଦି ଜୀବନ କେବଳ ।

ସତ ଅଛି, ମିଛ ଅଛି
ଦୁହେଁ ବି ନାହାଁନ୍ତି
ଘଟିଛି ଘଟଣା କିନ୍ତୁ
ମାୟାଜାଲେ ଜୀବନ କେବଳ ।

ଅଛି ଅତୀତ ଓ ଭବିଷ୍ୟତ
ଦୁହେଁ ସଂଜ୍ଞାହୀନ
ଆହୁଲା ମାରୁଛି ବର୍ତ୍ତମାନ
ସାଗରରେ ଜୀବନ କେବଳ ।

ହସ ଅଛି, କାନ୍ଦ ଅଛି
ଦୁହେଁ ବି ନାହାଁନ୍ତି
ସବୁ ଖାଲି ଶବ୍ଦ କୋଳାହଳ
ଜୀବନଟା ନଦୀ ସ୍ରୋତ ଜଳ ।

ଶାନ୍ତି ଅଛି, ଅଶାନ୍ତି ବି
ଦୁହେଁ ବି ନାହାଁନ୍ତି
ସବୁ ଖାଲି ପ୍ରହେଳିକା
କାରଣ, ଜୀବନଟା ଜୀବନ କେବଳ !!

ଶମ୍ଭୁନାଥ ଦାସ (ମୁଖ୍ଯ ସମ୍ପାଦକ : ଅଭିଯାନ)
ସମ୍ଭ୍ରାନ୍ତ ଓଡ଼ିଆ ସାହିତ୍ଯ ପତ୍ରିକା / କୋଲକାତା