ମୟୁରଭଞ୍ଜ ଜିଲ୍ଲାର ମୌଳିକ ସମସ୍ୟାଗୁଡ଼ିକର ସ୍ଥାୟୀ ସମାଧାନ, ଶିକ୍ଷା–ସ୍ୱାସ୍ଥ୍ୟ–ପାନୀୟ ଜଳ ଓ ଯୁବପିଢ଼ିର ଭବିଷ୍ୟତ ପାଇଁ ତୁରନ୍ତ ଓ ଦୀର୍ଘମିଆଦୀ ପଦକ୍ଷେପ ଗ୍ରହଣ ନିମନ୍ତେ ନିବେଦନ

ବାରିପଦା/ଉଦଳା, ତା୦୫/୧୦/୨୦୨୬(କ: ବ୍ଯୁ)

ମୟୁରଭଞ୍ଜ ଜିଲ୍ଲାର ମୌଳିକ ସମସ୍ୟାଗୁଡ଼ିକର ସ୍ଥାୟୀ ସମାଧାନ, ଶିକ୍ଷା–ସ୍ୱାସ୍ଥ୍ୟ–ପାନୀୟ ଜଳ ଓ ଯୁବପିଢ଼ିର ଭବିଷ୍ୟତ ପାଇଁ ତୁରନ୍ତ ଓ ଦୀର୍ଘମିଆଦୀ ପଦକ୍ଷେପ ଗ୍ରହଣ ନିମନ୍ତେ ଆଜି ଭଞ୍ଜସେନା, କପ୍ତିପଦା ଉପଖଣ୍ଡ ଶାଖା ପକ୍ଷରୁ ଅତିରିକ୍ତ ଜିଲ୍ଲାପାଳ ଓ ଉଦଳା ବ୍ଲକ ଶାଖା ପକ୍ଷରୁ ବ୍ଲକ ବିଡିଓ ଙ୍କ ଜରିଆରେ ଏକ ଦାବୀ ପତ୍ର ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦ୍ଧେଶ୍ୟରେ ପ୍ରଦାନ କରିଥିଲେ,ଏଥିରେ ଉପଖଣ୍ଡ ସଭାପତି ରାକେଶ ପଣ୍ଡା ,ସମ୍ବିତ୍ ପାଢ଼ୀ ,ସତ୍ୟଜିତ୍ ରାଉତ୍ ,ପ୍ରିୟବ୍ରତ ପଣ୍ଡା, ରାମେଶ୍ୱର ବିଶ୍ୱାଳ ,ସଞ୍ଜୟ ହାଁସଦା ,ସଞ୍ଜୀବ ବେହେରା ପ୍ରମୁଖ ଓ ଉଦଳା ବ୍ଲକ ଶାଖା ପକ୍ଷରୁ ନଗର ସଭାପତି ଲକ୍ଷ୍ମୀଧର ସାହୁ , ଜିଲ୍ଲା କାର୍ଯ୍ୟକାରୀ ସଭାପତି ରବିନ୍ ମହାନ୍ତି , ରାଜକିରଣ ରାଉତ୍ ,ଜୀବନ ବିଶ୍ୱାଳ ,ସେରାଲ ମୁର୍ମୁ , ପଦ୍ମଲୋଚନ ସରେନ୍ ,ରବୀନ୍ଦ୍ର ମାର୍ଣ୍ଡି , ବବଲୁ ଟୁଡୁ ପ୍ରମୁଖ ଯୁବ ଛାତ୍ର ଉପସ୍ଥିତ ଥିଲେ ।

Memorandum Copy………
ମାନ୍ୟବର ମୁଖ୍ୟମନ୍ତ୍ରୀ ମହୋଦୟ
ଓଡ଼ିଶା ସରକାର,
ଭୁବନେଶ୍ୱର।

ବିଷୟ: ମୟୁରଭଞ୍ଜ ଜିଲ୍ଲାର ମୌଳିକ ସମସ୍ୟାଗୁଡ଼ିକର ସ୍ଥାୟୀ ସମାଧାନ, ଶିକ୍ଷା–ସ୍ୱାସ୍ଥ୍ୟ–ପାନୀୟ ଜଳ ଓ ଯୁବପିଢ଼ିର ଭବିଷ୍ୟତ ପାଇଁ ତୁରନ୍ତ ଓ ଦୀର୍ଘମିଆଦୀ ପଦକ୍ଷେପ ଗ୍ରହଣ ନିମନ୍ତେ ନିବେଦନ।

ମହାଶୟ,
ସବୁଜିମାରେ ଭରପୂର, ପ୍ରାକୃତିକ ସମ୍ପଦରେ ସମୃଦ୍ଧ, ଐତିହ୍ୟ, ସଂସ୍କୃତି, କଳା ଓ ପରମ୍ପରାରେ ଗୌରବମୟ ମୟୁରଭଞ୍ଜ ଓଡ଼ିଶାର ଏକ ଅନନ୍ୟ ଜିଲ୍ଲା। ଏହି ମାଟି ରାଜ୍ୟକୁ ଅନେକ ପ୍ରତିଭା, କଳାକାର, କ୍ରୀଡ଼ାବିତ୍, ଶିକ୍ଷାବିତ୍ ଓ ସମାଜସେବୀ ଦେଇଛି।
କିନ୍ତୁ ଅତ୍ୟନ୍ତ ଦୁଃଖ ଓ ଚିନ୍ତାର ବିଷୟ ଯେ, ଆଜି ମଧ୍ୟ ମୟୁରଭଞ୍ଜର ଅନେକ ଅଞ୍ଚଳର ଲୋକେ ଏପରି କିଛି ମୌଳିକ ସୁବିଧା ପାଇଁ ସଂଘର୍ଷ କରୁଛନ୍ତି, ଯାହା ଏକ ସୁସ୍ଥ, ଶିକ୍ଷିତ ଓ ବିକଶିତ ସମାଜର ମୂଳ ଆବଶ୍ୟକତା।
ଏହା କେବଳ କିଛି ସମସ୍ୟାର ତାଲିକା ନୁହେଁ। ଏହା ଆମ ଶିଶୁମାନଙ୍କ ଭବିଷ୍ୟତ, ଆମ ଯୁବପିଢ଼ିର ସ୍ୱପ୍ନ ଓ ଆମ ଜିଲ୍ଲାର ସାମଗ୍ରିକ ଭବିଷ୍ୟତ ସହିତ ଜଡ଼ିତ ଏକ ଗଭୀର ଚିନ୍ତା।
ଏହି ପରିପ୍ରେକ୍ଷୀରେ ଆମେ ଆପଣଙ୍କ ନିକଟରେ ନିମ୍ନଲିଖିତ ବିଷୟଗୁଡ଼ିକ ପ୍ରତି ବିଶେଷ ଦୃଷ୍ଟି ଦେବା ପାଇଁ ବିନମ୍ର ନିବେଦନ କରୁଅଛୁ।
୧. ବିଶୁଦ୍ଧ ପାନୀୟ ଜଳ
ମୟୁରଭଞ୍ଜ ଜିଲ୍ଲାର ଗ୍ରାମାଞ୍ଚଳଠାରୁ ସହରାଞ୍ଚଳ ପର୍ଯ୍ୟନ୍ତ ବିଶୁଦ୍ଧ ଓ ନିରାପଦ ପାନୀୟ ଜଳ ଯୋଗାଣ ସମସ୍ୟାର ସ୍ଥାୟୀ ସମାଧାନ ପାଇଁ ଏକ ସମନ୍ୱିତ ଓ ଦୀର୍ଘମିଆଦୀ ଯୋଜନା ଗ୍ରହଣ କରାଯାଉ।
କେବଳ ପାଇପ୍ ବିଛାଇବା କିମ୍ବା ଯୋଗାଣ ବ୍ୟବସ୍ଥା କରିବା ନୁହେଁ, ପାଣିର ଗୁଣବତ୍ତା, ନିୟମିତ ଯୋଗାଣ, ରକ୍ଷଣାବେକ୍ଷଣ ଓ ଭବିଷ୍ୟତର ଆବଶ୍ୟକତାକୁ ଦୃଷ୍ଟିରେ ରଖି ଏକ ସ୍ଥାୟୀ ବ୍ୟବସ୍ଥା କରାଯିବା ଆବଶ୍ୟକ।
୨. ସ୍ୱାସ୍ଥ୍ୟସେବାର ସ୍ଥାୟୀ ଉନ୍ନତି
ମୟୁରଭଞ୍ଜର ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ଉନ୍ନତ ଓ ସୁଲଭ ସ୍ୱାସ୍ଥ୍ୟସେବାର ଆବଶ୍ୟକତା ରହିଛି।
ବିଶେଷକରି ବାରିପଦାସ୍ଥିତ ପି.ଆର.ଏମ. ମେଡିକାଲ୍ କଲେଜ୍ ଓ ହସ୍ପିଟାଲ୍‌କୁ ଆହୁରି ସୁଦୃଢ଼ କରି, ଆବଶ୍ୟକ ମାନବ ସମ୍ବଳ, ବିଶେଷଜ୍ଞ ଚିକିତ୍ସା, ଆଧୁନିକ ଚିକିତ୍ସା ଉପକରଣ, ଆବଶ୍ୟକ ଭିତ୍ତିଭୂମି ଓ ଜରୁରୀକାଳୀନ ସେବାକୁ ସୁଦୃଢ଼ କରିବା ସହିତ ସମଗ୍ର ଜିଲ୍ଲାର ସ୍ୱାସ୍ଥ୍ୟସେବା ସମସ୍ୟାର ଏକ ସ୍ଥାୟୀ ସମାଧାନ ପାଇଁ ପଦକ୍ଷେପ ନିଆଯାଉ।
ମୟୁରଭଞ୍ଜର ଜଣେ ରୋଗୀ କେବଳ ଉନ୍ନତ ଚିକିତ୍ସା ପାଇବା ପାଇଁ ଜିଲ୍ଲା ବାହାରକୁ ଯିବାକୁ ବାଧ୍ୟ ନ ହେଉନ୍ତୁ—ଏହା ଆମର ମୁଖ୍ୟ ଆଶା।
୩. ଅଙ୍ଗନବାଡ଼ିଠାରୁ ଉଚ୍ଚଶିକ୍ଷା ପର୍ଯ୍ୟନ୍ତ ଶିକ୍ଷା ବ୍ୟବସ୍ଥାର ସମ୍ପୂର୍ଣ୍ଣ ସୁଧାର……….
ମୟୁରଭଞ୍ଜର ଶିଶୁ ଓ ଯୁବପିଢ଼ି ହେଉଛନ୍ତି ଜିଲ୍ଲାର ସବୁଠାରୁ ବଡ଼ ସମ୍ପଦ। ସେମାନଙ୍କ ଭବିଷ୍ୟତକୁ ସୁଦୃଢ଼ କରିବା ବିନା ମୟୁରଭଞ୍ଜର ପ୍ରକୃତ ବିକାଶ ସମ୍ଭବ ନୁହେଁ। ଏହି ପରିପ୍ରେକ୍ଷୀରେ ଅଙ୍ଗନବାଡ଼ି କେନ୍ଦ୍ର, ପ୍ରାଥମିକ, ଉଚ୍ଚପ୍ରାଥମିକ ବିଦ୍ୟାଳୟ, ହାଇସ୍କୁଲ, କେଜିଭିବି ବାଳିକା ବିଦ୍ୟାଳୟ, ଆଦର୍ଶ ବିଦ୍ୟାଳୟ, ଏକଲବ୍ୟ ବିଦ୍ୟାଳୟ, ଏସ୍‌ଟି/ଏସ୍‌ସି ଓ ଅନ୍ୟାନ୍ୟ ସଂରକ୍ଷିତ ବର୍ଗର ଛାତ୍ରଛାତ୍ରୀଙ୍କ ଆଶ୍ରମ ବିଦ୍ୟାଳୟ, ଏସ୍‌ଏସ୍‌ଡି ବାଳିକା ବିଦ୍ୟାଳୟ ଆଦିର ଶିକ୍ଷା ଓ ଭିତ୍ତିଭୂମି ସମସ୍ୟାର ସମୀକ୍ଷା କରି ସ୍ଥାୟୀ ସମାଧାନ କରାଯାଉ।
ସେହିପରି ମହାବିଦ୍ୟାଳୟଠାରୁ ଏମ୍.ଏସ୍‌.ସି.ବି. ମେଡିକାଲ୍ କଲେଜ୍ ପର୍ଯ୍ୟନ୍ତ ଉଚ୍ଚଶିକ୍ଷା ଓ ବୃତ୍ତିଗତ ଶିକ୍ଷାର ଭିତ୍ତିଭୂମି, ଶିକ୍ଷକ ଓ ଅଧ୍ୟାପକ ପଦବୀ, ଆଧୁନିକ ପରୀକ୍ଷାଗାର, ପୁସ୍ତକାଳୟ, ଛାତ୍ରାବାସ ଓ ଆବଶ୍ୟକ ଶିକ୍ଷା ସୁବିଧାକୁ ସୁଦୃଢ଼ କରିବା ଆବଶ୍ୟକ।
୪. ଡ୍ରପ୍-ଆଉଟ୍ ହ୍ରାସ ଓ ଶିଶୁ ଶ୍ରମ ସମ୍ପୂର୍ଣ୍ଣ ନିରାକରଣ
କୌଣସି ଶିଶୁର ହାତରେ ବହି ଓ କଲମ ଥିବା ସମୟରେ ତାଙ୍କ ହାତରେ ଶ୍ରମର ଭାର ରହିବା ଆମ ସମାଜ ପାଇଁ ଏକ ଗଭୀର ଯନ୍ତ୍ରଣାର ବିଷୟ।
ତେଣୁ ମୟୁରଭଞ୍ଜରେ ଛାତ୍ରଛାତ୍ରୀଙ୍କ ଡ୍ରପ୍-ଆଉଟ୍ ସଂଖ୍ୟା ହ୍ରାସ କରିବା, ବିଦ୍ୟାଳୟ ଛାଡ଼ୁଥିବା ଶିଶୁଙ୍କୁ ପୁନଃ ଶିକ୍ଷା ବ୍ୟବସ୍ଥାରେ ସାମିଲ କରିବା ଏବଂ ଶିଶୁ ଶ୍ରମ ପ୍ରଥାକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ଦୃଢ଼ ଓ ନିରନ୍ତର ପଦକ୍ଷେପ ନିଆଯାଉ।
୫. ବାଲ୍ୟ ବିବାହ ପ୍ରଥାର ସମ୍ପୂର୍ଣ୍ଣ ନିରାକରଣ
ଆମ ଝିଅମାନଙ୍କ ଶୈଶବ ଓ ସ୍ୱପ୍ନକୁ ଅକାଳରେ ବିବାହର ବନ୍ଧନରେ ବାନ୍ଧିଦେବା କିମ୍ବା ବାନ୍ଧିହେବା ଏକ ଗଭୀର ସାମାଜିକ ସମସ୍ୟା।
ବାଲ୍ୟ ବିବାହକୁ ସମ୍ପୂର୍ଣ୍ଣ ବନ୍ଦ କରିବା, କିଶୋରୀମାନଙ୍କୁ ଉଚ୍ଚଶିକ୍ଷା ଓ କୌଶଳ ବିକାଶର ସୁଯୋଗ ଦେବା, ପରିବାର ଓ ସମାଜ ମଧ୍ୟରେ ସଚେତନତା ବୃଦ୍ଧି କରିବା ଏବଂ ଆବଶ୍ୟକ ସ୍ଥାନରେ ଆଇନର କଡ଼ା ଅନୁପାଳନ ପାଇଁ ଏକ ସମନ୍ୱିତ ଅଭିଯାନ ଗ୍ରହଣ କରିବାକୁ ଅନୁରୋଧ |

          ଆମେ ଏହି ସ୍ମାରକପତ୍ର ମାଧ୍ୟମରେ କେବଳ ସମସ୍ୟା ଉପସ୍ଥାପନ କରୁନାହୁଁ। ଆମେ ଆଶା ନେଇ ଆପଣଙ୍କ ନିକଟକୁ ଏହି ପତ୍ର ଲେଖିଚୁ।
                ମୟୁରଭଞ୍ଜର ଲୋକେ ଉନ୍ନତି ଚାହାଁନ୍ତି। ଆମ ଶିଶୁମାନେ ଭଲ ଶିକ୍ଷା ଚାହାଁନ୍ତି। ଆମ ଯୁବପିଢ଼ି ନିଜ ଜିଲ୍ଲାରେ ସୁଯୋଗ ଚାହାଁନ୍ତି। ଆମ ମା'ମାନେ ନିରାପଦ ପାନୀୟ ଜଳ ଓ ଉନ୍ନତ ସ୍ୱାସ୍ଥ୍ୟସେବା ଚାହାଁନ୍ତି। ଆମ ଝିଅମାନେ ନିଜ ସ୍ୱପ୍ନ ପୂରଣ କରିବାର ଅଧିକାର ଚାହାଁନ୍ତି।
                ମୟୁରଭଞ୍ଜର ଯୁବକ ଓ ଯୁବତୀମାନେ ନିଜ ମାଟିରେ ସମ୍ମାନଜନକ ଜୀବନ ଓ ରୋଜଗାରର ସୁଯୋଗ ପାଆନ୍ତୁ; ସେମାନଙ୍କୁ ବାଧ୍ୟ ହୋଇ ଅନ୍ୟ ରାଜ୍ୟକୁ ପ୍ରବାସୀ ଶ୍ରମିକ ଭାବେ ଯିବାକୁ ନ ପଡ଼ୁ,ଏହା ଆମର ମୂଳ ଆକାଂକ୍ଷା।

ଏଣୁ ଆପଣଙ୍କୁ ଆମର ଆନ୍ତରିକ ଅନୁରୋଧ,ଦୟାକରି ମୟୁରଭଞ୍ଜର ଏହି ସମସ୍ୟାଗୁଡ଼ିକୁ ନିଜେ ଗୁରୁତ୍ୱର ସହ ବିଚାର କରନ୍ତୁ। ଆବଶ୍ୟକ ହେଲେ ଏକ ଉଚ୍ଚସ୍ତରୀୟ ସମୀକ୍ଷା କରାନ୍ତୁ, ବିଭାଗଗୁଡ଼ିକୁ ନେଇ ଏକ ସମନ୍ୱିତ କାର୍ଯ୍ୟଯୋଜନା ପ୍ରସ୍ତୁତ କରନ୍ତୁ ଏବଂ ଆପଣଙ୍କ ବିବେଚନାନୁସାରେ ଯାହା ଆବଶ୍ୟକ, ତାହା ତୁରନ୍ତ ଓ ଦୀର୍ଘମିଆଦୀ ଭିତ୍ତିରେ କାର୍ଯ୍ୟକାରୀ କରନ୍ତୁ।
ଆମର ବିଶ୍ୱାସ, ଆପଣଙ୍କ ଗୋଟିଏ ସମ୍ବେଦନଶୀଳ ହସ୍ତକ୍ଷେପ ମୟୁରଭଞ୍ଜର ଲକ୍ଷଲକ୍ଷ ଲୋକଙ୍କ ଜୀବନରେ ଆଶାର ଏକ ନୂଆ ଆଲୋକ ଆଣିପାରିବ। ଆମର ଭବିଷ୍ୟତକୁ ସୁରକ୍ଷିତ, ସମୃଦ୍ଧ ଓ ସ୍ୱାଭିମାନୀ କରିବା ଦିଗରେ ଆପଣଙ୍କ ଦୃଢ଼ ପଦକ୍ଷେପ ପାଇଁ ଆମେ ଆଶାବାଦୀ।
ଦୀନବନ୍ଧୁ ବାରିକ
(ମୟୂରଭଞ୍ଜ ଜିଲ୍ଲା ପ୍ରତିନିଧି)