ପାହାଡ଼ ପର୍ବତ ଗିରି କି ହ୍ରଦରୁ
ଝରଣା ରୂପେ ଉତ୍ପନ୍ନ,
ସମତଳ ଭୂମି ବକ୍ଷ ଚିରି ବହେ
ନଦୀ ମାତା ସମ୍ବୋଧନ ।
ପୃଥିବୀ ଗାତ୍ରରେ ଦେଢ଼ଲକ୍ଷାଧିକ
ନଦୀ ଯେ’ ପ୍ରବହମାନ,
ତନ୍ମଧ୍ଯେ ଦକ୍ଷିଣ – ଆମେରିକାସ୍ଥିତ
ଦୀର୍ଘ ନଦୀ ଆମାଜନ ।
କୃଷ୍ଣା ଗୋଦାବରୀ ନର୍ମଦା କାବେରୀ
ମହାନଦୀ ବ୍ରହ୍ମପୁତ୍ର,
ସିନ୍ଧୁ ଆଉ ଗଙ୍ଗା ଭାରତେ ଚାରିଶ’
ନଦୀ ମଧ୍ଯରେ ବିଶିଷ୍ଟ ।
ନଦୀ ଜଳେ ଆମ ସବୁଜ ବନାନୀ
ଫଳ-ପୁଷ୍ପ ମନୋହର,
ନଦୀବନ୍ଧେ ଶିଳ୍ପ ଓ କୃଷିସମ୍ପଦ
ଜଳପ୍ରାଣୀଙ୍କ ବିହାର ।
ସେପ୍ଟେମ୍ବର ଶେଷ ରବିବାର ଆଜି
ଯେ’ ବିଶ୍ଵ ନଦୀ ଦିବସ,
ଗଙ୍ଗା ଠାରୁ ଗୋଦା- ବରୀ ନଦୀ ଆମ
ଭାରତେ ପୁଣ୍ୟ ବିଶେଷ ।
ଗଙ୍ଗା ଯମୁନା ଓ ସରସ୍ଵତୀ ପୁଣ୍ୟ
ତ୍ରିବେଣୀ ସଙ୍ଗମ ଜାଣ,
ମହା ପୁଣ୍ୟ ତୀର୍ଥ ଯେ’ ହିନ୍ଦୁସ୍ତାନର
ସ୍ନାନ’ରେ ମୋକ୍ଷ ନିର୍ବାଣ ।
ପୁଣ୍ୟ ବୈତରଣୀ ଉତ୍କଳ ଗାତ୍ରରେ
ଶ୍ରାଦ୍ଧରେ ପିତୃ-ପୁରୁଷ,
ପରମାତ୍ମା ସାଥେ ଆତ୍ମା ଯୁଗ୍ମ ପ୍ରାୟେ
ସାଗରେ ନଦୀ ହରଷ ।
ନଦୀ ପରି ବହି ଚାଲ ସେ ମାନବେ
କର୍ମ- କର୍ତ୍ତବ୍ୟେ ଚଞ୍ଚଳ,
ଗଙ୍ଗା ମାତା ପାଦେ ଅର୍ଘ୍ୟ ସମର୍ପଣେ
ଆଶିଷ ହେଉ ପ୍ରବଳ ।