ଓ୍ବାଶିଂଟନ,୧୧ା୧: ୨୦୨୩ ବିଶ୍ୱ ଅର୍ଥନୀତି ପାଇଁ ଏକ ବିପଜ୍ଜନକ ବର୍ଷ ହେବାକୁ ଯାଉଛି। କାରଣ ଯେଉଁ ମାନ୍ଦାବସ୍ଥାକୁ ନେଇ ଅର୍ଥନୀତିଜ୍ଞମାନେ ଚିନ୍ତା କରୁଥିଲେ ତାହା ଆସିସାରିଛି। ଆମେରିକା, ୟୁରୋପ ଓ ଚାଇନା ଭଳି ବୃହତ୍ ଅର୍ଥନୀତିରେ ଦୁର୍ବଳ ଅଭିବୃଦ୍ଧି ଯୋଗୁ ବୈଶ୍ୱିକ ମାନ୍ଦାବସ୍ଥାର ଦ୍ୱାରଦେଶରେ ପୃଥିବୀବାସୀ ଛିଡ଼ା ହୋଇଛନ୍ତି। ମଙ୍ଗଳବାର ନିଜ ବାର୍ଷିକ ରିପୋର୍ଟରେ ଏଭଳି ଭୟଙ୍କର ଚେତାବନୀ ଦେଇଛି ବିଶ୍ୱବ୍ୟାଙ୍କ।
ଦରିଦ୍ର ରାଷ୍ଟ୍ରଗୁଡ଼ିକୁ ବିକାଶମୂଳକ ପ୍ରକଳ୍ପ ପାଇଁ ଆର୍ଥିକ ସହାୟତା ପ୍ରଦାନ କରୁଥିବା ବିଶ୍ୱବ୍ୟାଙ୍କ ଏହାର ଆନୁଆଲ୍ ରିପୋର୍ଟ ପ୍ରକାଶ କରିଛି। ଏଥିରେ ଉଲ୍ଲେଖ କରାଯାଇଛି, ଚଳିତ ବର୍ଷ ବୈଶ୍ୱିକ ଅଭିବୃଦ୍ଧି ପ୍ରାୟ ଅଧା ହ୍ରାସ ପାଇ ୧.୭%କୁ ଖସିବ, ଯାହାକି ୩% ରହିବା ନେଇ ପୂର୍ବରୁ ଆକଳନ କରାଯାଇଥିଲା। ଉକ୍ତ ଭବିଷ୍ୟବାଣୀ ସତ ପ୍ରମାଣିତ ହେଲେ ୩ ଦଶନ୍ଧି ମଧ୍ୟରେ ଏହା ହେବ ତୃତୀୟ ଦୁର୍ବଳତମ ବାର୍ଷିକ ପ୍ରସାରଣ। ଏହା ପୂର୍ବରୁ ୨୦୦୮ରେ ବୈଶ୍ୱିକ ଆର୍ଥିକ ସଙ୍କଟ ଦେଖାଦେଇଥିବାବେଳେ ୨୦୨୦ରେ କରୋନା ମହାମାରୀଜନିତ ଆର୍ଥିକ ମନ୍ଥରତା ସବୁ ଦେଶକୁ କବଳିତ କରିଥିଲା।
ଆମେରିକା ଚଳିତବର୍ଷର ମାନ୍ଦାବସ୍ଥାକୁ ଏଡ଼ାଇବା ପାଇଁ ସବୁ ପ୍ରକାର ଉଦ୍ୟମ ଚଳାଇଥିଲେ ମଧ୍ୟ ୟୁଏସ୍ ଅର୍ଥନୀତିର ଅଭିବୃଦ୍ଧିରେ ୦.୫% ହ୍ରାସ ଘଟିବ। ଅତ୍ୟାବଶ୍ୟକ ସାମଗ୍ରୀଗୁଡ଼ିକର ଆକାଶଛୁଅଁା ଦରବୃଦ୍ଧି ଓ ଏଥିରେ ଲଗାମ ଲଗାଇବା ପାଇଁ ଆମେରିକାର କେନ୍ଦ୍ରୀୟ ବ୍ୟାଙ୍କ ଫେଡେରାଲ ରିଜର୍ଭ ସୁଧ ହାର ବଢ଼ାଉଛି। ତଥାପି ବିଶ୍ୱ୍ୟାବ୍ୟାପୀ ଅର୍ଥନୀତିରେ ଦୁର୍ବଳତା ଆମେରିକାର ବ୍ୟବସାୟିକ ସଂସ୍ଥା ଓ ଉପଭୋକ୍ତାଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିବ। ରୁଷିଆ-ୟୁକ୍ରେନ୍ ଯୁଦ୍ଧ ଯୋଗୁ ଯୋଗାଣ ଶୃଙ୍ଖଳ ବ୍ୟାହତ ହୋଇଥିବାବେଳେ ଯଦି କୋଭିଡ୍-୧୯ ସଂକ୍ରମଣ ବଢ଼େ ତେବେ ଆମେରିକା ଉପରେ ଆହୁରି ବିପଦ ଦେଖାଦେବ। ଦୀର୍ଘ ସମୟ ଧରି ଚାଇନାକୁ ରପ୍ତାନି କ୍ଷେତ୍ରରେ ବୃହତ୍ ଭୂମିକା ନେଇଆସୁଥିବା ୟୁରୋପ ମଧ୍ୟ ଚାଇନାର ଦୁର୍ବଳ ଅର୍ଥନୀତି ଯୋଗୁ ପ୍ରଭାବିତ ହେବ। ବିଶ୍ୱବ୍ୟାଙ୍କ ରିପୋର୍ଟରେ ଆହୁରି ଦର୍ଶାଯାଇଛି, ଆମେରିକା ଓ ୟୁରୋପ ଭଳି ବୃହତ୍ ଅର୍ଥନୀତିଗୁଡ଼ିକରେ ସୁଧହାର ବୃଦ୍ଧି ଗରିବ ଦେଶଗୁଡ଼ିକରୁ ପୁଞ୍ଜିନିବେଶକୁ ଆକର୍ଷିତ କରିବ। ଫଳରେ ସେହି ଦେଶଗୁଡ଼ିକ ଗୁରୁତ୍ୱପୂର୍ଣ୍ଣ ଘରୋଇ ନିବେଶରୁ ବଞ୍ଚତ୍ତ ହେବେ। ରୁଷିଆର ୟୁକ୍ରେନ୍ ଆକ୍ରମଣ ଯୋଗୁ ଖାଦ୍ୟ ମୂଲ୍ୟ ଉଚ୍ଚରେ ଥିବାବେଳେ ଏହି ସୁଧହାର ବୃଦ୍ଧି ହେତୁ ବିକଶିତ ରାଷ୍ଟ୍ରଗୁଡ଼ିକରେ ଅଭିବୃଦ୍ଧି ଧିମେଇଯିବ ବୋଲି ବିଶ୍ୱବ୍ୟାଙ୍କ ପ୍ରେସିଡେଣ୍ଟ ଡେଭିଡ୍ ମାଲପାସ୍ ଗଣମାଧ୍ୟମକୁ ସୂଚନା ଦେଇଛନ୍ତି। ସାହାରୀୟ ଆଫ୍ରିକା ଭଳି ଅଞ୍ଚଳର ଦରିଦ୍ର ଦେଶଗୁଡ଼ିକରେ ପୃଥିବୀର ୬୦% ଗରିବ ଲୋକ ବସବାସ କରନ୍ତି। ବୈଶ୍ୱିକ ମାନ୍ଦାବସ୍ଥାର କଷାଘାତ ଏଭଳି ଲୋକଙ୍କୁ ସବୁଠୁ ବେଶି ବାଧିବ। ବିଦ୍ୟୁତ୍, ସାର, ଖାଦ୍ୟ ଓ ପୁଞ୍ଜି ସୀମିତ ହୋଇଯିବ। ୨୦୨୩ ଓ ୨୦୨୪ରେ ମୁଣ୍ଡପିଛା ଆୟ ମାତ୍ର ୧.୨% ବଢ଼ିବ।