ନୂଆଦିଲ୍ଲୀ/ନିକୋସିଆ,୨୯।୧୨ : ଭୂମଧ୍ୟସାଗରରେ ତୁର୍କୀର ଆକ୍ରୋଶ ଯୋଗୁ ଅସୁବିଧାରେ ପଡିଥିବା ସାଇପ୍ରସ ପ୍ରତିରକ୍ଷା ସମେତ ଭାରତ ସହିତ ଅନେକ ଚୁକ୍ତି କରି ଏକ ଦୃଢ଼ ବାର୍ତ୍ତା ଦେବାକୁ ଯାଉଛି। ଭାରତର ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଗୁରୁବାର ସାଇପ୍ରସ ଗସ୍ତ ଆରମ୍ଭ ହୋଇଛି। ଏହି ଗସ୍ତକାଳରେ ପ୍ରତିରକ୍ଷା ସହ ଇମିଗ୍ରେଶନ ଉପରେ କେତେକ ଚୁକ୍ତିନାମା ସ୍ବାକ୍ଷରିତ ହେବ। ସାଇପ୍ରସ ଗସ୍ତରେ ଜୟଶଙ୍କର ପାକିସ୍ତାନର ନିର୍ଦ୍ଦେଶରେ କଶ୍ମୀର ଏବଂ ଭାରତ ପ୍ରସଙ୍ଗରେ କଡ଼ା ମନ୍ତବ୍ୟ ଦେଉଥିବା ତୁର୍କୀ ରାଷ୍ଟ୍ରପତି ରେସିପ ତାଇପ ଏର୍ଦୋଗନଙ୍କୁ ଉଚିତ ଉତ୍ତର ଦେବେ।
ଭୂମଧ୍ୟସାଗରର ପ୍ରାକୃତିକ ସମ୍ପଦ ଏବଂ ଅଞ୍ଚଳ ଉପରେ ସାଇପ୍ରସ ଏବଂ ତୁର୍କୀ ମଧ୍ୟରେ ଦୀର୍ଘ ଦିନ ଧରି ବିବାଦ ଲାଗି ରହିଛି। ଜୟଶଙ୍କରଙ୍କ ସହ ଆଲୋଚନା ସମୟରେ ତୁର୍କୀ ସହ ବିବାଦ ଉପରେ ଆଲୋଚନା ହୋଇପାରେ ବୋଲି ଆଶା ରହିଛି। ସ୍ପୁଟନିକର ରିପୋର୍ଟ ଅନୁଯାୟୀ, ଜୟଶଙ୍କର ଏବଂ ସାଇପ୍ରସ ମଧ୍ୟରେ ବିଶେଷ ଭାବରେ ପ୍ରତିରକ୍ଷା ଏବଂ ସାମରିକ ସହଯୋଗ ଉପରେ ଏକ ବୁଝାମଣାପତ୍ର ସ୍ବାକ୍ଷରିତ ହେବ। ଏହା ବ୍ୟତୀତ ଶକ୍ତି କ୍ଷେତ୍ରରେ ମଧ୍ୟ ଚୁକ୍ତି ହେବାର ସମ୍ଭାବନା ଅଛି ।
ଭାରତ ଏବଂ ସାଇପ୍ରସ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ହେଉଛି ୨୧୪ ନିୟୁତ ଡଲାର। ଏକ ଇମିଗ୍ରେଶନ ଚୁକ୍ତି କରି ଏହାକୁ ଆହୁରି ବୃଦ୍ଧି କରିବାକୁ ଏକ ଯୋଜନା ରହିଛି। ସାଇପ୍ରସର ବୈଦେଶିକ ମନ୍ତ୍ରଣାଳୟ ଜୟଶଙ୍କରଙ୍କ ଗସ୍ତକୁ ଗୁରୁତ୍ୱପୂର୍ଣ୍ଣ ବୋଲି କହିଛି। ଦ୍ୱିପାକ୍ଷିକ ସମ୍ପର୍କ ଉପରେ ଉଭୟ ପକ୍ଷ ଆଲୋଚନା କରିବେ ବୋଲି ମନ୍ତ୍ରଣାଳୟ କହିଛି। ଏହା ବ୍ୟତୀତ ଆଞ୍ଚଳିକ ସଂରଚନାରେ ଭାରତର ଅଂଶଗ୍ରହଣକୁ ବିଚାର କରାଯିବ। ତୁର୍କୀର ନୀତି ବିଷୟରେ ସାଇପ୍ରସ ବୈଦେଶିକ ମନ୍ତ୍ରୀ ଆଇଓନିସ ଭାରତୀୟ ବହିର୍ବ୍ୟାପାର ମନ୍ତ୍ରୀଙ୍କୁ ଏନେଇ ସୂଚନା ଦେବେ।