କଟକ: ଆସନ୍ତା ନଭେମ୍ବର ୧୧ ତାରିଖରେ କଟକ ସହରରେ ମା’ କାଳୀଙ୍କ ମେଢ଼ ଭସାଣି ଉତ୍ସବ ଅନୁଷ୍ଠିତ ହେବ। ଏହି ଉତ୍ସବକୁ ଶୃଙ୍ଖଳିତ ଓ ସୁରୁଖୁରୁରେ ସମ୍ପନ୍ନ କରିବା ସହ ଜନସାଧାରଣଙ୍କ ଯାତାୟାତକୁ ସୁବିଧାଜନକ କରିବା ଉଦ୍ଦେଶ୍ୟରେ କମିଶନରେଟ୍ ପୋଲିସ ପକ୍ଷରୁ ସ୍ୱତନ୍ତ୍ର ଟ୍ରାଫିକ୍ ବ୍ୟବସ୍ଥା ଲାଗୁ କରାଯାଇଛି।
ପୋଲିସ ପକ୍ଷରୁ ଜାରି ସାର୍ବଜନୀନ ବିଜ୍ଞପ୍ତି ଅନୁଯାୟୀ, ନଭେମ୍ବର ୧୧ ତାରିଖ ସକାଳ ୭ଟାରୁ ଭସାଣି ଉତ୍ସବ ଶେଷ ହେବା ପର୍ଯ୍ୟନ୍ତ କଟକ ସହରର ବିଭିନ୍ନ ରାସ୍ତାରେ ଯାନବାହନ ଚଳାଚଳ ଉପରେ କଟକଣା ରହିବ। ଭସାଣି ଶୋଭାଯାତ୍ରା ଯେଉଁ ରାସ୍ତା ଦେଇ ଯିବ, ସେହି ରାସ୍ତାରେ ସାଧାରଣ ଯାନବାହନ ଚଳାଚଳକୁ ନିୟନ୍ତ୍ରଣ କରାଯିବ। ବିକଳ୍ପ ରାସ୍ତା ଦେଇ ଯାତାୟାତ କରିବାକୁ ଗାଡ଼ିଚାଳକଙ୍କୁ ପରାମର୍ଶ ଦିଆଯାଇଛି।
ବିଶେଷକରି ମାଲଗୋଦାମ, ରାଣୀହାଟ, ମଙ୍ଗଳାବାଗ, ମହାନଦୀ ରିଙ୍ଗ୍ରୋଡ୍, ହାଇକୋର୍ଟ ଛକ, ବାଦାମବାଡ଼ି ଓ ପୁରୀଘାଟ ଅଞ୍ଚଳରେ ଯାନବାହନ ଚଳାଚଳ ପାଇଁ ସ୍ୱତନ୍ତ୍ର ନିୟମ ଜାରି ହୋଇଛି। ଏଥିସହ ଭସାଣି ଶୋଭାଯାତ୍ରା ଯୋଗୁଁ ଭିଡ଼ ଏଡ଼ାଇବା ପାଇଁ ବିଭିନ୍ନ ରାସ୍ତାରେ ଯାନବାହନର ଗତିପଥ ପରିବର୍ତ୍ତନ କରାଯାଇଛି।
ଅନ୍ୟପକ୍ଷରେ ଦୁଇଚକିଆ ଓ ଚାରିଚକିଆ ଯାନ ପାଇଁ ସହରର ବିଭିନ୍ନ ସ୍ଥାନରେ ପୃଥକ୍ ପାର୍କିଂ ବ୍ୟବସ୍ଥା କରାଯାଇଛି। ରେଭେନ୍ସା କଲେଜିଏଟ୍ ସ୍କୁଲ ପଡ଼ିଆ, ଶହୀଦ ଭବନ, ଅନ୍ୟାନ୍ୟ ନିର୍ଦ୍ଦିଷ୍ଟ ପାର୍କିଂ ସ୍ଥଳ ସମେତ ବିଭିନ୍ନ ପଡ଼ିଆରେ ଗାଡ଼ି ରଖିବାକୁ ବ୍ୟବସ୍ଥା ହୋଇଛି।
ଅଗ୍ନିଶମ ବାହିନୀ, ଆମ୍ବୁଲାନ୍ସ ଓ ଜରୁରୀକାଳୀନ ସେବାରେ ନିୟୋଜିତ ଯାନବାହନ ପାଇଁ ଏହି କଟକଣା ଲାଗୁ ହେବ ନାହିଁ।
ତେଣୁ ଭସାଣି ଉତ୍ସବ ସମୟରେ ଅଯଥା ଟ୍ରାଫିକ୍ ଜାମ୍ ଏଡ଼ାଇବା ପାଇଁ ନିର୍ଦ୍ଧାରିତ ରାସ୍ତା ଓ ପାର୍କିଂ ସ୍ଥଳ ବ୍ୟବହାର କରିବା ସହ ପୋଲିସର ଟ୍ରାଫିକ୍ ନିୟମ ପାଳନ କରିବାକୁ କଟକବାସୀଙ୍କୁ ଅନୁରୋଧ କରାଯାଇଛି।