ରାଜଗାଙ୍ଗପୁର: ରାଜଗାଙ୍ଗପୁର ପୋଲିସ ଷ୍ଟେସନ ଅନ୍ତର୍ଗତ କାଂଶବାହାଲ ଫାଣ୍ଡି ନିକଟ ମହତାବ ରୋଡରେ ଥିବା ଏକ ବନ୍ଦ ଘରେ ଅଜ୍ଞାତ ଚୋରମାନେ ପଶି ଲକ୍ଷ ଲକ୍ଷ ଟଙ୍କାର ସୁନା, ରୂପା ଅଳଙ୍କାର ଏବଂ ନଗଦ ଲୁଟି ନେଇ ପଳାଇଛନ୍ତି। ଘଟଣା ସମୟରେ, ପୀଡିତ ବିଜୟାନନ୍ଦ ମିଶ୍ର ଏବଂ ତାଙ୍କ ପରିବାର ଗତକାଲି ସନ୍ଧ୍ୟାରେ ଦିଲଦାର ବସ୍ ଯୋଗେ କସବାହାଲରୁ ଭୁବନେଶ୍ୱର ଅଭିମୁଖେ ବାହାରିଥିଲେ। ଆଜି ସକାଳେ, ଏଲଆଣ୍ଡଟି କଲୋନିରେ ରହୁଥିବା ପୀଡିତଙ୍କ ଭାଇ ପୂଜା କରିବାକୁ ବିଜୟାନନ୍ଦଙ୍କ ଘରେ ପହଞ୍ଚିବା ପରେ, ତାଲା ଭଙ୍ଗା ଦେଖି ସେ ଆଶ୍ଚର୍ଯ୍ୟ ହୋଇଗଲେ ଓ ତୁରନ୍ତ ସେ ଘଟଣା ବିଷୟରେ କାଂଶବାହାଲ ପୋଲିସ ଚୌକି କୁ ଖବର ଦେଇଥିଲେ।
ସୂଚନା ଅନୁଯାୟୀ, ମାଲିକ ବିଜୟାନନ୍ଦ ମିଶ୍ର ଗତରାତିରେ ଘର ତାଲା ପକାଇ ତାଙ୍କ ପରିବାର ସହିତ ଭୁବନେଶ୍ୱର ଯାଇଥିଲେ। ଗତକାଲି ରାତିରେ, ଏହି ଏକାକୀତାର ସୁଯୋଗ ନେଇ ଚୋରମାନେ ମୁଖ୍ୟ ଦ୍ୱାରର ତାଲା ଭାଙ୍ଗି ଘରେ ପ୍ରବେଶ କରିଥିଲେ। ଚୋରମାନେ ଆଲମାରୀ ଏବଂ ଲକରର ତାଲା ଭାଙ୍ଗି ସେଥିରେ ଥିବା ଲକ୍ଷ ଲକ୍ଷ ଟଙ୍କାର ଅଳଙ୍କାର ଏବଂ ସାମଗ୍ରୀ ନେଇ ପଳାଇ ଯାଇଥିଲେ। ଘଟଣା ସମ୍ପର୍କରେ ସୂଚନା ପାଇ ରାଜଗାଙ୍ଗପୁର ପୋଲିସ ଏବଂ କାଂସବାହାଲ ପୋଲିସର ଦଳ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି ଓ ପୋଲିସ ନିକଟରେ ଲାଗିଥିବା ସିସିଟିଭି କ୍ୟାମେରାର ଫୁଟେଜ ଯାଞ୍ଚ କରୁଛି ଯାହା ଦ୍ଵାରା ଚୋରମାନଙ୍କର ରାସ୍ତା ଖୋଜା ଯାଇପାରିବ ଏବଂ ସେମାନଙ୍କୁ ଚିହ୍ନଟ କରାଯାଇ ପାରିବ।
ରାଜଗାଙ୍ଗପୁରରୁ ଅବଦୁଲ ରଜାକ ଖାନଙ୍କ ରିପୋର୍ଟ